Pro 21 | WSK | STEP | KARI BIYA king alo ikia nungarso se noko kuring la karo tusan, yu gamung luan karo karo namoso iwitata karo tusan.

Proverbs 21

KARI BIYA ilak wete mel suen la betenak mu asele terong la ko

1 KARI BIYA king alo ikia nungarso se noko kuring la karo tusan,
yu gamung luan karo karo namoso iwitata karo tusan.
2 Ni ikisam ni pempem kilek diram la betesam ma balsam agi,
wore KARI BIYA nika ikia aguwaya te mel bitawasam mu ariwoso.
3 Munan nunguning diram la te daiga bagara ko munan mu KARI BIYA munan mu ko ninguru kueso,
mu tama bita KARI BIYA tua ko munan mu kiaram.
4 Kariimet nunumi patowara se nusupuling lagara ko munan bita lagasan, mu kilek memek betesan.
5 Kariimet ninguru ikia tasan asele ura betesan, mu nunga ura mu yawarakala aratoso se nungumik mel ago bagasan.
Bare kariimet ninguru me ikia tasan, am uririki sipa se ura ilumonko ago kaesan,
mu nunga ura mu nunguning me nama aratoso se mel ko tukunang asan.

6 Kari bo kawel te mel suen biya giok,
mu mel umutang nu dagarok iwita talipuruk se kuera ko lage te bagurukko.
Ale ko meltutuk umutang mu taiti nuwi tai bolala awuso baga tairatela mena namoso iwitata, mena namurukko.
7 Kariimet kilek memek bita lagasan ale saki alo nunga bita maguwusan, mu nongota nunga kilek memek umutang nunga maguwurokko,
mu awuk nuna munan ningo diram mu betemonko mia gilingisan.
8 Kariimet kilek memek betesan, mu nuna lage diram wetang te mu me karosan,
lage daeldel pukapung mu karo tusan.
Bare kariimet kilek memek bo me betesan, mu nuna munan ningo diram la betesan.
9 Ni ka imet kuring ining munak gurum mu ilak kawam te bagerko mu me terong.
Mu tagi to ale kumik duap te mena, awar bagerko mu asele yawarakala.
10 Kariimet kilek memek bita se anira, mu tom suen biya munan memek betemonko kua lagasan.
Se nuna awiriya mu me nongomang tui gilingisan.
11 Kari supuling lagara mu ilup ale moarko,
mu te kariimet saki ikia mena mu nu kumik te aringimon ale ikia ningo tamonko.
Se bo ikia ningo ago mu ikia tui, mu nu eng ikia biyala taukko.

12 KARI BIYA ko munan diram nunguningkiri.
Se kariimet memek alo kilek aguwaya bita se anisan, mu nu ari ikiwoso,
ale memek te nunga bitirukko.
13 Ni kariimet kituwura nunga sangaruko ka arumon,
se ni degewa sisirok se nuguring me ilup,
mu tom udagi ni ikup arik ale saki alo ka sangarmonko air,
bare betelatala me ka sangarmonko.
14 Ka bo ni ko ko gomang maguruk agi mu, kariimet saki me ikisan la, mel ningo bo gomang te ira ko mu tuiko.
Se kari memek alo mu kilek koma suwantatala betesan ale nunga saki alo nongomang te kulukua ko,
tetela la mel saki nungarsan se te nongomang biyala ikuwawoso mu menaso.
15 Tom den ikup diram la tutesan ale arigisan, mu kariimet ningo diram mu amilmilasan.
Bare memek betera ko kari alo nguangasan.
16 Kari ikia ningo ko lage mu buring tuso,
mu nu nama kuera nunga nuguwim te aratoso.
17 Kari bo na ningo ningo se waen yawara yawara se mel ningo no gi se bagurukko kaeruk,
mu noko manga mel menaruk se nu kumik mel mena bagurukko.

18 Kariimet memek mu kariimet ningo nuam nunga bita maguwumonko ago kaesan,
bare ko koma memek mu nuna nongota la gi gilingisan.
19 Ka imet kuring ining munak gurum ilak kawam te bagerko mu me terong.
Mu tagi to ale sor kariimet mena te bagerko mu asele terong.
20 Kariimet ikia ningo nongote ago, mu nuna na inang yawara tom udagi te no se bagomonko mu gi kawam tugu gilingisan.
Bare kariimet ikia ningo nongote mena,
mu nuna mel suen la am no kutuwu sapasan.
21 Kilek diram la bita se saki alo nunga kua se lager,
mu ni ali imi te tom maiya biya yawarakala bagerko,
se kariimet nip patawomonko.
22 Kariimet saki balsan, “Anananga wonong ko kar mu aora biya se sokel garagar,” masan,
bare kari ikia ningo ago mu nongorak kageruruk ale kar mu parasuwurokko terong mam. ^{▼▼Pro 21:22 Ana Kris alo nanga kager: 2 Cor 10:3-5; Eph 6:10-18.}
23 Ni ikup arikko me kuar agi mu,
ni anapeya den munakerko mu ninguru ko sinar toko.
24 Kari numi patowara ale saki alo nunga gusia ale supuling lagara ko kari,
mu tom suen biya nu kota numi nup patawurukko sail tagi lagoso.

25 Kari gagor kuruwim, ura iluwokko meso,
mu nu kota ko daiga bagara maguwuso.
26 Tom suen biya nu melmasak giokko la kueso.
Bare kariimet ningo diram mu saki alo mel nungarmonko kuesan ale mel biyala nungarsan.

27 KARI BIYA nu kariimet memek bita lagasan mu tama bita tumonko mu nu me ko kueso nunguningkiri.
Se nuna munan kawel karo tumon ale tama bita tumon, mu KARI BIYA nononga kilek umu mel iwiwara iwita arigiso.
28 Kari den kawel munaka lagoso,
mu kariimet noko den ikimonko me kuesan.
Bare kari den tuteso ale ninguru ko ikiso balso,
mu kariimet noko den ko nodogowa gurugumon ikimonko.
29 Kariimet memek bitawara mu nuna kawelasan ale kariimet ningo ko nunumi betesan.
Bare kariimet diram alo mu nunga bagara aolak pempem la diram anirukko kuesan.

30 Ni ali imi te kari ka ikia terong sinar masam, ale ni anapeya ura bitarko ko ikiwasam agi,
bare nika ikia sumu KARI BIYA ko ikia karogo koma suwanta mena,
mu ka ikia sumu nunguning me kapurukko.
31 Kager kari alo kagermonko nunga horse girisan nunguru awusan.
Bare KARI BIYA baluk mu asele nuna nunga kager komasang mu nunga kiamonko. ^{▼▼Pro 21:31 Kager kam te: Psalm 33:16-17; 44:6.}